விஜயானந்த் திரை விமர்சனம்

கர்நாடக மாநிலத்தை சேர்ந்த விஜயானந்த் ரோட்லைன்ஸ் நிறுவனத்தின் நிறுவனர் விஜய் சங்கேஸ்வர். ஒரு லாரியுடன் தனது தொழிலை தொடங்கிய இவர், தற்போது சர்வதேச அளவில் மிகப்பெரிய தொழிலதிபர். சரக்கு போக்குவரத்து துறையோடு பத்திரிகை துறையிலும் மிகப்பெரிய சாதனைகளை செய்த அவரது சாதனைப்பயணத்தில் அவர் சந்தித்த சோதனைகள், எதிர்ப்புகள் மற்றும் ஏமாற்றங்களை எப்படி முறியடித்து உச்ச நிலையை எட்டினார் என்பதே படம். கன்னட சினிமாவின் முதல் வாழ்க்கை வரலாற்று படம் என்ற பெருமையும் இந்த படத்துக்கு உண்டு.
தொழிலதிபர் விஜய் சங்கேஸ்வர் கதாபாத்திரத்தில் வரும் நடிகர் நிஹால்அமைதியான நடிப்பில் மனதில் பதிகிறார். லாரியில் சரக்கு ஏற்றவிடாமல் தடுக்கும் போட்டியாளர்களிடம் மோதும் இடத்தில் அவரது அந்த ஆவேசம் அப்பப்பா. தந்தைக்கும் மகனுக்குமான அந்த ‘காட்டிக்கொள்ளாத’ பாசத்தை இவர் உணர்ந்து கொள்ளும் இடங்கள் அற்புதமானவை. மகனுக்கு ஆலோசனை சொல்லும் இடங்களில் பொறுப்பான ஒரு தொழில்அதிபரை கண்முன் நிறுத்துகிறார்.
விஜய் சங்கேஸ்வரின் மகனான ஆனந்த் சங்கேஸ்வர் வேடத்தில் பாரத் போபண்ணா அமைதியின் சின்னமாக வருகிறார்.
விஜய் சங்கேஸ்வரின் மனைவியாக சிரி பிரஹலாத், அப்பாவாக ஆனந்த் நாக் பொருத்தமான பாத்திரத்தேர்வு. மகனின் பெருமை உணர்ந்து நெகிழும் இடத்தில் ‘யப்போவ்…கலங்கடிச்சிட்டீங்க…’
கீர்த்தன் புஜாரி ஒளிப்பதிவில் 1969 ஆம் ஆண்டு காட்சிகள் மிக நேர்த்தி.
இசையமைப்பாளர் கோபி சுந்தரின் இசையில் பாடல்களும், பின்னணி இசையும் அளவு. அழகு.
ஒருவரது வாழ்க்கை வரலாற்றை படமாக்கும் போது இருக்கும் சவால்களை மிக சாமத்தியமாக சமாளித்திருக்கிறார் இயக்குநர் ரிஷிகா சர்மா. தொழிலதிபர், பத்திரிகைத்துறை முதலாளி, அரசியல்வாதி என பன்முகம் கொண்ட விஜய் சங்கேஸ்வரின் வெற்றிப்பயணத்தை காட்சியாக வடித்ததில் படமும் நிதானமாக போகிறது. பத்திரிகை அதிபருடனான மோதல் காட்சிகளை தவிர்த்திருக்கலாம்.

விஜயானந்த், வெற்றியும் ஆனந்தமும் இணைந்த படைப்பு.