க் பட விமர்சனம்

ஒரு கால்பந்து வீரனுக்கு ஒரு ஆட்டத்தின் நடுவே ஒர் விபத்து நிகழ்கிறது. அதன்பிறகு அவன் வாழ்க்கையில் நிகழும் அடுத்தடுத்த சம்பவங்கள் அவனை குழப்புவதாகவும், ஆச்சர்யத்தை தருவதாகவும் இருக்கிறது. அவனை சுற்றி நடக்கும் குழப்பங்களுக்கான காரணம் என்ன? அவனுக்கு ஏன் அந்த சம்பவங்கள் நடக்கிறது ? என்ற இரு கேள்விகளை வைத்து உருவானதே இந்த ‘க்.’

படத்தில் வசந்த் சந்திரசேகர் என்ற கால் பந்து வீரர் கேரக்டரில் நடித்திருக்கிறார் யோகேஷ். காயம் பட்டு மருத்துவமனையில் சிகிச்சை பெற்று வரும் நிலையில் அங்குள்ள ஜன்னல் வழியாக ஒரு கொலை நடப்பதை பார்க்கிறார்.

அதுபற்றி போலீஸ் மற்றும் மருத்துவர்களிடம் கூறுகிறார். ஆனால் அவர்களோ அப்படி ஒரு கொலை நடக்கவில்லை என்று நிரூபிக்கிறார்கள். இந்த காட்சியின்போது தானொரு புதுமுகம் என்பதை யோகேஷ் மறந்த மாதிரியே நாமும் மறந்து கேரக்டரோடு ஐக்கியமாகி விடுகிறோம்.

அவரது மனைவியாக வரும் அனிகா கிடைத்த கேரக்டரில் கில்லி அடிக்கிறார்.அந்த டிரைவர் கேக்டரில் தனக்கே உரிய பாணியில் நடித்து அசத்தி இருக்கிறார் குரு சோமசுந்தரம். சின்ன சின்ன அசைவுகளில் கூட நடிப்பு எட்டிப்பார்க்கிறது.

ஒய்.ஜி. மகேந்திரன், ஆடுகளம் நரேன் அனுபவ நடிப்பை வெளிப்படுத்தி இருக்கிறார்கள்.

ஜீவி படத்திற்கு கதை, திரைக்கதை எழுதிய பாபு தமிழ் இப்படத்தின் மூலம் இயக்குனராகியிருக்கிறார். மிகவும் சிக்கலான கதையை எடுத்து இயக்கியதற்கு முதலில் பாராட்டு. சின்னச் சின்ன வசனங்களுக்கு கூட இறுதியில் அர்த்தம் கொடுத்து இருக்கிறார். எல்லா விடைகளும் தெரிந்த பிறகும் இருவித கிளைமாக்ஸ் தந்திருப்பது இயக்க முத்திரை.

கவாஸ்கர் அவினாஷ் பின்னணி இசையில் காட்சிகளோடு ஒன்ற வைக்கிறார். ராதா கிருஷ்ணனின் ஒளிப்பதிவு புதிய கோணத்தில் திரையோட்டத்துக்கு உதவியிருக்கிறது.