IFFI 2026 இந்தியன் பனோரமா பிரிவில் அதிகாரப்பூர்வமாகத் தேர்வான ‘தாய்க்கிழவி’ – SK Productions நிறுவனத்திற்குக் கிடைத்த மற்றுமொரு பெருமை!
இந்தியத் திரையுலகின் மிக முக்கியமான திரைப்பட விழாக்களில் ஒன்றான IFFI-யின் இந்தியன் பனோரமா பிரிவில் இடம்பெற்றிருப்பது, தமிழ் சினிமாவுக்கும், ‘தாய்க்கிழவி’ திரைப்படத்திற்கும், அதன் தயாரிப்பு நிறுவனமான SK Productions-க்கும் கிடைத்துள்ள மிகப்பெரிய அங்கீகாரமாகும். இந்த மகிழ்ச்சியான தருணத்தைப் படக்குழுவினர் பெருமையுடன் கொண்டாடி வருகின்றனர்.
ராதிகா சரத்குமார் முதன்மைக் கதாபாத்திரத்தில் நடித்த ‘தாய்க்கிழவி’ திரைப்படம், திரையரங்குகளில் வெளியானபோது ரசிகர்கள் மற்றும் விமர்சகர்களிடையே மிகப்பெரிய வரவேற்பைப் பெற்றது. குறிப்பாக, வயதான பெண்ணின் வாழ்க்கை, குடும்ப உறவுகள், சமூகத்தின் பார்வை, பெண்களின் சுயமரியாதை எனப் பல்வேறு அம்சங்களை நகைச்சுவையும் உணர்வுப்பூர்வமான தருணங்களும் கலந்து சொல்லியிருந்த இப்படம், வணிக ரீதியாகவும் மாபெரும் வெற்றியைப் பெற்றது. உலகளவில் 90 கோடி ரூபாய்க்கும் அதிகமான வசூலைப் பெற்ற இப்படம், 2026-ம் ஆண்டின் குறிப்பிடத்தக்க வெற்றிப் படங்களில் ஒன்றாகவும் இடம்பிடித்தது.
இப்படத்தில் பவுனுத்தாயி கதாபாத்திரத்தில் வாழ்ந்திருந்த ராதிகா சரத்குமாரின் நடிப்பு திரையுலகினர், விமர்சகர்கள் மற்றும் ரசிகர்களிடையே பெரும் பாராட்டுகளைப் பெற்றது. அவருடன் நடித்திருந்த ஒவ்வொரு நடிகரும் தங்களது கதாபாத்திரங்களுக்கு வலுசேர்த்திருந்தனர். குறிப்பாக, தனது முதல் திரைப்படத்திலேயே அழுத்தமான கதையையும், தனித்துவமான கதாபாத்திரங்களையும், உணர்வுப்பூர்வமான காட்சிகளையும் சிறப்பாகக் கையாண்ட அறிமுக இயக்குநர் சிவகுமார் முருகேசனின் எழுத்து மற்றும் இயக்கம் பெரிதும் பாராட்டப்பட்டது. ஒரு வலுவான கதையையும் திறமையான படைப்புக் குழுவையும் நம்பி உருவாக்கப்பட்ட திரைப்படம், ரசிகர்களின் ஆதரவால் மிகப்பெரிய வெற்றியைப் பெற்றதுடன் தற்போது இந்தியன் பனோரமா தேர்வின் மூலம் மேலும் ஒரு முக்கியமான மைல்கல்லை எட்டியுள்ளது.
சிவகார்த்திகேயன் தொடங்கிய SK Productions நிறுவனம் தனது முதல் தயாரிப்பான ‘கனா’ திரைப்படத்திலிருந்தே தனித்துவமான கதைகளுக்கும், புதிய இயக்குநர்கள் மற்றும் அறிமுகக் கலைஞர்களுக்கும் தொடர்ந்து வாய்ப்பளித்து வருகிறது. பெண்கள் கிரிக்கெட்டை மையமாகக் கொண்டு உருவான ‘கனா’ திரைப்படத்தின் மூலம் இயக்குநர் அருண்ராஜா காமராஜை அறிமுகப்படுத்திய இந்நிறுவனம், அடுத்ததாக கார்த்திக் வேணுகோபாலன் இயக்கத்தில் ரியோ ராஜ் நடித்த ‘நெஞ்சமுண்டு நேர்மையுண்டு ஓடு ராஜா’ திரைப்படத்தைத் தயாரித்தது. தொடர்ந்து அருண் பிரபு புருஷோத்தமன் இயக்கிய ‘வாழ்’, நெல்சன் திலீப்குமார் இயக்கிய ‘டாக்டர்’, சிபி சக்கரவர்த்தி இயக்கிய ‘டான்’, கமலக்கண்ணன் இயக்கிய ‘குரங்கு பெடல்’, பி.எஸ். வினோத்ராஜ் இயக்கிய ‘கொட்டுக்காளி’, ராஜவேல் இயக்கிய ‘ஹவுஸ் மேட்ஸ்’ எனப் பல்வேறு கதைக்களங்களிலும், மாறுபட்ட சினிமா முயற்சிகளிலும் இந்நிறுவனம் தொடர்ந்து தனது பங்களிப்பை வழங்கி வருகிறது.
குறிப்பாக, புதிய இயக்குநர்களின் திறமையை அடையாளம் கண்டு அவர்களுக்கு வாய்ப்பளிப்பதிலும், வழக்கமான வணிக சினிமா எல்லைகளைக் கடந்து புதிய கதை சொல்லல் முயற்சிகளை ஆதரிப்பதிலும் SK Productions தொடர்ந்து தனித்துவமான பாதையில் பயணித்து வருகிறது.
அந்தப் பயணத்தின் மற்றுமொரு பெருமையாகவே ‘தாய்க்கிழவி’ திரைப்படத்திற்குக் கிடைத்துள்ள IFFI 2026 இந்தியன் பனோரமா அதிகாரப்பூர்வத் தேர்வு அமைந்துள்ளது. ஒரு திரைப்படம் வணிக ரீதியாகப் பெரிய வெற்றியைப் பெறுவதுடன், அதன் கலைத்தன்மை மற்றும் கதை சொல்லும் நேர்த்திக்காகவும் தேசிய அளவிலான திரைப்பட விழாவில் அங்கீகரிக்கப்படுவது படைப்புக் குழுவினருக்குக் கிடைக்கும் மிகப்பெரிய கௌரவமாகும். அந்த வகையில், ‘தாய்க்கிழவி’ திரைப்படத்தின் இந்தச் சாதனை ராதிகா சரத்குமார், இயக்குநர் சிவகுமார் முருகேசன், தயாரிப்பாளர்கள் சிவகார்த்திகேயன், சுதன் சுந்தரம் மற்றும் ஒட்டுமொத்த படக்குழுவினருக்கும் கிடைத்துள்ள பெருமையாகும்.
‘கனா’ முதல் ‘தாய்க்கிழவி’ வரை தனித்துவமான படைப்புகளையும், புதிய கலைஞர்களையும், மாறுபட்ட சினிமா முயற்சிகளையும் தொடர்ந்து ஆதரித்து வரும் SK Productions நிறுவனத்தின் தயாரிப்புப் பயணத்தில், இந்த அங்கீகாரம் மற்றுமொரு மகுடமாக அமைந்துள்ளது.
