தி சோஷியல் ரெக்கனிங் விமர்சனம்

ஆரோன் சோர்கின் இயக்கி எழுதியுள்ள ‘தி சோஷியல் ரெக்கனிங் (The Social Reckoning)’ திரைப்படம், 2021-ஆம் ஆண்டு ஃபேஸ்புக் நிறுவனத்தின் ரகசியங்களை அம்பலப்படுத்திய பிரான்சஸ் ஹாகனின் ‘பேஸ்புக் ஃபைல்ஸ்’ எனும் உண்மைச் சம்பவத்தை அடிப்படையாகக் கொண்ட ஒரு விறுவிறுப்பான புலனாய்வுப் படமாகும்.

2010 இல் வெளியான ‘தி சோஷியல் நெட்வொர்க்’ படத்தின் தொடர்ச்சியாகக் கருதப்படும் இப்படம், வெறும் மார்க் ஜக்கர்பெர்க்கின் வாழ்க்கையை மட்டும் பேசாமல், பெருநிறுவன லாபத்திற்காகப் பயனாளர்களின் பாதுகாப்பைச் சமரசம் செய்த தொழில்நுட்ப அதிகாரத்தைக் கேள்விக்கு உட்படுத்துகிறது. தகவல் கசிவாளர் பிரான்சஸ் ஹாகன் (மைக்கி மேடிசன்) மற்றும் பத்திரிகையாளர் ஜெஃப் ஹோர்விட்ஸ் (ஜெர்மி ஆலன் ஒயிட்) ஆகியோரின் துணிச்சலான சட்டப் போராட்டத்தை சோர்கின் தனது வழக்கமான கூர்மையான, வேகமான வசனங்களால் அமைத்துள்ளார். ஆனால், இயக்கத்தில், தி சோஷியல் நெட்வொர்க் படத்தின் இயக்குநர் டேவிட் ஃபின்ச்சர் பதித்த முத்திரையைத் தொட முடியாமல் சிரமப்பட்டுள்ளார் சோர்கின். ஃபின்ச்சரின் அட்டகாசமான ஃப்ரேம்களும், ஒளியையும் நிழலையும் திரையில் கையாண்ட விதமும், தி சோஷியல் நெட்வொர்க்கை ஒரு மாஸ்டர்பீஸ் ஆக்கியிருந்தது. முந்தைய பாகத்தோடு ஒப்பிடுகையில், மேக்கிங் அளவில் இப்படம் பின்தங்கியே உள்ளது.

மைக்கி மேடிசன் மற்றும் ஜெர்மி ஆலன் ஒயிட்டின் நடிப்பில் யதார்த்தமான உணர்ச்சிப் போராட்டங்களும், மார்க் ஜக்கர்பெர்க்காக வரும் ஜெர்மி ஸ்ட்ராங்கின் அழுத்தமான முகபாவனைகளும் பாராட்டத்தக்க வகையில் அமைந்திருந்தன.

நிஜ உலகில் மெட்டா நிறுவனம் பெரிய மாற்றங்களைச் சந்திக்காத நிலையில், படத்தின் முடிவு சற்றே கற்பனையான வெற்றியாகத் தெரிகிறது. சில குறைகள் இருந்தாலும், தற்கால இணைய உலகமும், சமூக ஊடகங்களும், ஜனநாயகத்தையும் மனித மனங்களையும் எவ்வாறு பாதிக்கின்றன என்பதை ஆழமாக விளக்கும் ஒரு முக்கியப் படமாக ‘தி சோஷியல் ரெக்கனிங்’ கவனிக்கத்தக்கது.