டி3 பட விமர்சனம்

குற்றாலத்தில் உள்ள ஒரு காவல் நிலையம் டி3. அங்கு இன்ஸ்பெக்டராக இருக்கும் நாயகன் பிரஜின், ஒரு விபத்தால் இளம்பெண்ணுக்கு நேர்ந்த மரணம் குறித்து விசாரிக்கத் தொடங்குகிறார். அந்த விசாரணையைத் தொடங்கியதிலிருந்தே பல சிக்கல்கள். இதில் உச்சக்கட்டமாக அவர் மனைவியும் அதேபோன்றதொரு விபத்தில் இறந்து போக… விபத்துகளுக்கு காரணம் என்ன? விசாரணை முடிவு என்னவானது என்பது எதிர்பாராத அதிரிபுதிரி கிளைமாக்ஸ்
நாயகன் பிரஜின் காவல்துறை ஆய்வாளர் வேடத்துக்குப் பொருத்தமாக இருக்கிறார். நடிப்பிலும் தேர்ச்சி விகிதம் கூடியிருக்கிறது. தனது விசாரணை நீண்டுகொண்டே போக, அதில் மனைவின் இறப்பும் சேர்ந்து கொள்ள, தவிப்பும் துடிப்புமான அந்த இடத்தில் நெகிழ வைக்கிற நடிப்பு.
பிரஜின் மனைவியாக நடித்திருக்கும் வித்யா பிரதீப் அந்த பாத்திரத்தோடு பொருந்திப் போகிறார்.
அப்பாவித்தன முகத்துடன் வரும் டாக்டராக ராகுல் மாதவ் கதையின் சஸ்பென்சுக்கு பொருத்தமாக இருக்கிறார்.
புலனாய்வுப் படங்களுக்கேற்ற பரபரப்பை மணிகண்டனின் கேமரா செய்து முடிக்க, அந்த திகிலுக்கு திரில்லான ஒளிப்பதிவை மணிகண்டன் தந்திருக்கிறார். பாடல்களை பி.கே.வும் பின்னணி இசையை ஸ்ரீஜித்தும் குறையொன்றுமில்லாமல் கொடுத்திருக்கிறார்கள்.

நூற்றுக்கணக்கான விபத்துகள் ஒரேமாதிரி நடப்பது யார் கண்ணையும் உறுத்தவில்லையா? என்பது உள்ளிட்ட அடிப்படையான சில கேள்விகள் இருந்தாலும், அவற்றைத் தாண்டி அதற்கான காரணம் புதுமையாக இருப்பது படத்தின் சிறப்பு. சஸ்பென்சை கடைசிவரை கட்டிக்காத்த விதத்திலும் டைரக்டர் பாலாஜி தனித்து தெரிகிறார்.