யசோதா பட விமர்சனம்
நடுத்தர குடும்பத்தை சேர்ந்த சமந்தாவுக்கு தனது தங்கையின் உயிரைக் காக்க வேண்டிய நிர்ப்பந்தம். மருத்துவமனை ஆபரேஷனே தீர்வு என்றும் அதற்கு லட்சங்களில் செலவாகும் என்றும் சொல்லி விட…அதேநேரம் வாடகைத் தாயாக மாறினால் லட்சக்கணக்கில் பணம் என்ற தகவல் தேடி வர, வாடகைத்தாயாக மாறுகிறார் சமந்தா. அவர் தங்கியிருக்கும் ஆடம்பர விடுதியில் அவரைப்போன்ற பல இளம் வாடகைத் தாய்கள் இருக்கிறார்கள். விசேஷ கவனிப்பில் அவர்கள் தங்க வைக்கப்பட்டிருந்தாலும் அங்கே நடக்கும் சில சம்பவங்கள் சமந்தாவை உற்று நோக்க வைக்கிறது. அப்போது இந்த வாடகைத்தாய் மையம் ஒரு சமூக விரோதி பின்னணியில் இயங்குவது தெரிய வர…
அதன்பிறகு சமந்தா மேற்கொள்ளும் புத்திசாலித்தனமான அதிரடி ஆக்–ஷன்கள், அவர் தங்கை என்னவானார் என்பது அதிரடி கிளைமாக்ஸ்.
மொத்தப்படத்தையும் ஒத்தை ஆளாக தன் தோளில் சுமந்ந்திருக்கிறார் சமந்தா. வாடகை தாயாக அப்பாவி பெண் தோற்றத்தில் அந்த படோடோப விடுதிக்குள் அடியெடுத்து வைக்கும்போதே என்னவோ செய்யப்போகிறார் என்பது புரிந்து போகிறது. வயிற்றில் கருவை சுமந்தபடி அங்கு நடக்கும் எதிர்மறை நிகழ்வுகளை அவர் ஆராயத் தொடங்குவதில் இருந்தே வேகம் பிடித்து விடுகிறது, படம். அங்கே நடக்கும் மோசடி தெரிந்தபின் எதிரிகளை ஆலிவுட் ரேஞ்சுக்கு அடித்து துவைத்து காயப்போடுகிற அத்தனை காட்சிகளும் விறுவிறுப்பின் உச்சம். தன்னை பரிசோதனை செய்ய வரும் இளம் டாக்டரிடம் காதல் ஆழம் பார்க்கும் இடங்கள் அழகுணர்வுடன் கூடிய அற்புத ரசனை.
வாடகைத் தாய்களை வைத்து கோடிகள் பார்க்கும் வில்லியாக வரலட்சுமி. வில்லி நடிப்பில் தானொரு கில்லி என்பதை சர்க்கார் படத்தை தொடர்ந்து இந்த படத்திலும் நிரூபித்திருக்கிறார். சமந்தாவுக்கு தன்னைப்பற்றிய உண்மை தெரிந்து விட்டது என்பதை உணர்ந்ததும் அதை அவர் எதிர்கொள்வது தனி நடிப்பழகு.
டாக்டராக உன்னிமுகுந்தன், போலீஸ் அதிகாரியாக சம்பத் படத்தின் பவர்புல் வேடங்களில் சிறப்பு சேர்க்கிறார்கள்.
சுகுமாரின் ஒளிப்பதிவும் மணிஷர்மாவின் இசையும் இந்த பிரமாண்ட திரைக்கதைக்குள் புகுந்து ராஜாங்கம் செய்கிறார்கள். கலைநயமிக்க அந்த ஆஸ்பத்திரி செட்டுப் போட்டவரை கட்டிப் பிடித்து பாராட்ட வேண்டும்.
இரட்டை இயக்குனர்கள் ஹரி -ஹரீஷ் இயக்கி இருக்கிறார்கள். புதுமையான கதைக்கருவை எடுத்துக்கொண்டு அதை காட்சிப்படுத்திய விதத்தில் கடைசிவரை சஸ்பென்ஸ் குறையாமல் இரட்டை சதம் அடித்திருக்கிறார்கள்.
இந்த யசோதா, பெண்ணின் பெருமை.