பிரின்ஸ் படவிமர்சனம்

பள்ளி ஆசிரியரான சிவகார்த்திகேயன், தான் பணியாற்றும் பள்ளியில் ஆங்கில ஆசிரியையான இங்கிலாந்து நாட்டு பெண் மரியாவை காதலிக்கிறார். மரியாவும் அவருடைய காதலை ஏற்றுக் கொள்ள, இவர்களின் காதலுக்கு சிவகார்த்திகேயனின் அப்பா சத்யராஜ் மட்டுமின்றி ஒட்டு மொத்த ஊரே எதிர்ப்பு தெரிவிக்கிறது. எதிர்ப்புக்கான காரணம் என்ன? எதிர்ப்பை மீறி காதலர்கள் ஒன்று சேர்ந்தார்களா என்பது கிளைமாக்ஸ்.
சிவகார்த்திகேயன் காமெடியை நம்பி இந்த படத்தை ஒப்புக்கொண்டிருப்பார் போலும். நாயகி மரியாவை கண்டதும் காதல் கொள்பவர், தன் காதல் பற்றி அப்பாவுக்கு புரிய வைப்பது, ஊர் மக்களை சமாளிப்பது என்று அனைத்து ஏரியாவிலும் அவரே கதைக்கு தோள் கொடுக்கிறார். நடனத்திலும் தேர்ச்சி தெரிகிறது.
நாயகியாக வரும் உக்ரைன் நாட்டு நடிகை மரியாவுக்கு காதல் காட்சி வசப்படவில்லை என்றாலும், தனது காதல், திருமணம் வரை போகுமா என்ற கலக்கத்தின்போது நடிப்பில் கவனிக்க வைக்கிறார்..
சிவகார்த்திகேயனின் அப்பாவாக சத்யராஜ். பேசுகிறார், பேசுகிறார். பேசிக்கொண்டே இருக்கிறார். நடிக்க வாய்ப்பில்லாத கேரக்டரில் பாவம் இவர் தான் என்ன செய்வார்.
இதுவரை காமெடியனாக அறியப்பட்ட பிரேம்ஜி, இந்த படத்தில் வில்லனாக புரமோஷன் பெற்றிருக்கிறார்.
சிறப்பு தோற்றத்தில் வரும் சூரி, எட்டிப்பார்த்த வேகத்தில் தலைமறைவாகி விடுகிறார்.
போலீஸ் அதிகாரியாக ஆனந்தராஜ் வரும் காட்சி தான் இ்ந்த தீபாவளிக்கான உண்மையான காமெடிச் சரவெடி.
சிவகார்த்திகேயனின் நண்பர்களாக நடித்திருக்கும் யூடியுப் பிரபலங்கள் காமெடி என்ற பெயரில் ‘கடி’த்து வைக்கிறார்கள்.
மனோஜ் பரமஹம்சாவின் ஒளிப்பதிவில் காட்சிகள் பளிச். தமனின் இசையில் பாடல்கள் ரசனை.
நகைச்சுவையை மட்டுமே நம்பி திரைக்கதை அமைத்திருக்கிறார் இயக்குநர் அனுதீப். சிவகார்த்திகேயனின் காமெடி படத்திற்கு பலம் சேர்த்திருந்தாலும், காதல், எதிர்ப்பு என்ற வட்டத்தையே கதை சுற்றி வருவதால் காட்சிகளில் வேகக்குறைவு. அதை சிரிப்பு மூலம் சரிக்கட்டப் பார்க்கிறார்கள்.