சஞ்சீவன் பட விமர்சனம்

வினோத் லோகிதாஸ், சத்யா என்.ஜே, ஷிவ் நிஷாந்த், விமல் ராஜ், யாஷின் நெருங்கிய நண்பர்கள். நாயகன் வினோத் லோகிதாஸ் ஸ்நூக்கர் விளையாட்டில் தேர்ந்தவர். ஒரு போட்டியில் அவர வெற்றி பெற, அதை கொண்டாடுவதற்காக நண்பர்கள் சுற்றுலா செல்கிறார்கள். போகும் வழியில் அவர்களின் உயிருக்கு ஆபத்து ஏற்படும் அளவுக்கு ஒரு பிரச்சினை வருகிறது. அது என்ன? அதில்இந்த தப்பினார்களா என்பது பரபர விறுவிறு கிளைமாக்ஸ்.
நண்பர்களாக நடித்திருக்கும் ஐந்து பேரும் படம் முழுக்க இயல்பான நடிப்பில் வலம் வருகிறார்கள். உண்மையான நண்பர்களாக வாழ்ந்திருக்கிறார்கள்.
இவர்களில் வினோத் லோகிஸ்தாசுக்கு மிகவும் பொறுப்பான கேரக்டர். நண்பர்களை இவர் எதிர்கொள்ளும் விதமும் காதலியிடம் காட்டும் கண்ணியமும் இன்றைய இளைஞர்களின் ரோல் மாடலாக இவரை தூக்கி நிறுத்துகிறது. நாயகி திவ்யா துரைசாமி இயல்பான நடிப்பில் கவர்கிறார். ஆர்ப்பாட்டமில்லாத நடிப்பு இவரிடம் கொட்டிக் கிடக்கிறது.
பிரபல ஆடை வடிவமைப்பாளராக வரும் சத்யா என்.ஜே, காமெடி டபுள் ஒ.கே. இனி இவரை அடுத்தடுத்த படங்களில் நகைச்சுவை கேரக்டர்களில் நிறைய பார்க்கலாம்.
காதலிக்கும் பெண் எப்படிப்பட்டவள் என்று தெரியாமலேயே உருகி உருகி காதலிக்கும் கதாப்பாத்திரத்தில் நடித்திருக்கும் ஷிவ் நிஷாந்த், படம் முழுவதும் ஜாலியாக இருப்பதோடு, தனது நடிப்பால் கவனம் பெறுகிறார். அந்த காதலி யார் என்று தெரிய வரும்போது நிஜமாகவே காதலுக்கு மரியாதை.
முரட்டுத்தன இளைஞனை நடிப்பில் பிரதிபலிக்கிறார், யாஷின். இவர்போலிசில் சிக்கும் காட்சி ரகளைக் காமெடி.

தனுஜ் மேனனின் இசையில் பாடல்கள் ரசிக்கலாம். சில இடங்களில் இளையராஜாவின் இசையை பயன்படுத்தி கவனம் ஈர்க்கிறார்.
ஒளிப்பதிவாளர் கார்த்திக் ஸ்வர்ணகுமாரின் கேமரா, கார் சேசிங் காட்சியை படம் பிடித்தவிதத்துக்காகவே உச்சி முகரலாம்.
எழுதி இயக்கியிருக்கும் மணி சேகர், நண்பர்களின் வாழ்க்கையோடு, ஸ்நூக்கர் விளையாட்டையும் கதைக்களமாக்கி திரைக்கதை அமைத்து பாலு மகேந்திராவின் பட்டறையில் இருந்து வந்த மாணவன் என்பதை உறுதிப்படுத்தியிருக்கிறார்்
சொல்ல வந்த எளிமையான விஷயத்தை முழுமையாகவே சொல்லியிருக்கிறார். படம் முழுவதும் நிரம்பிக் கிடக்கும் நகைச்சுவை இயக்குனர் ஸ்பெஷல். கிளைமாக்ஸ் எதிர்பாராதது.