மஹா பட விமர்சனம்

விமான பணிப்பெண்ணான ஹன்சிகா, பைலட் சிம்புவை காதலிக்கிறார். காதல் வளர்ந்து வயிற்றில் குழந்தையும் வளர்ந்த நிலையில், விமான விபத்தில் காதலன் போய்ச்சேர…இப்போது பிறந்த பெண் குழந்தையும் அம்மாவும். ஆனாலும் தொலைத்த மகிழ்ச்சியை மகளின் வளர்ச்சியில் கண்டுகொள்ளும் ஹன்சிகா , தன்னை மகிழச்சியாக வைத்தககொள்கிறார்.

சலனமில்லா அந்த வாழ்வுக்கும் வந்தது சோதனை. சைக்கோ கொலைகாரன் ஒருவனால் ஹன்சிகாவின் செல்ல மகள் கடத்தப்பட… மகளை மீட்க போலீசை நாடுகிறார்.
ஆனால் விசாரணையில் எந்த முன்னேற்றமும் இல்லை என்பதால், ஹன்சிகாவே களத்தில் இறங்குகிறார். மகளை மீட்டாரா? என்பது திகுதிகு மீதிக்கதை.
ஹன்சிகாவின் காதலனாக அறிமகமாகி அன்பை பொழிந்து அவசரஅவசரமாக பூவுலக வாழ்வை முடித்துக் கொள்ளும் கேரக்டரில் சிம்பு. வந்த கொஞ்ச நேரத்திலும் அதிரடி, காதல் என்று அவருடைய மேனரிசத்தை அழுத்தமாக பதித்து விடுகிறார். அவரது ஒரிஜினல் லவ் ஸ்டோரிக்கு திரையரங்கம் அதிர்கிறது.
மாறுபட்ட நடிப்பில் ஹன்சிகா. வெறுமனே டூயட் மட்டும் பாடாமல் தன் குழந்தைக்காகவும் அடுத்தவர் குழந்தைக்காகவும் ரிஸ்க் எடுக்கும் காட்சிகளில் ஆவேச ஹன்சிகாவை பார்க்க முடிகிறது.

போலிஸ் அதிகாரியாக வரும் ஸ்ரீகாந்த் தனது கேரக்டருக்கு நியாயம் செய்கிறார். தம்பி ராமையா, கருணாகரன், சிறுமி மானஸ்வி கதையின் இன்ன பிற வேர்கள்.

ஜிப்ரான் இசையில் பாடல்கள் ஓ.கே. லட்சுமண் கேமரா கதையோடு பயணித்திருக்கிறது. குழந்தை கடத்தல் கதைக்குள் பாதிக்கப்பட்ட தாயின் மனநிலையை இணைத்து கதை பண்ணியதில் நாயகிக்கும் சேர்த்து பெருமை சேர்த்திருக்கிறார், இயக்கிய யு.ஆர்.ஜமீல்.